Türkan

Türkan, Koliba Film imzalı, 2010-2011-ci illərdə Kanal D-də ekrana gələn dram janrında türk televiziya serialıdır. Ssenarisi Oya Yüce tərəfindən yazılan layihənin prodüserliyini Ata Türkoğlu öz üzərinə götürmüşdür.

Serial, həyatını təhsilə və cəmiyyətə həsr etmiş olan Türkan Saylanın həyat hekayəsini nəql edir. Baş rollarını Pınar Öğün, Saygın Soysal və Özgürcan Çevik bölüşərkən heyətdə Damla Sönmez, Uğur Polat və İsmail Demirci kimi aktyorlar da yer alır.

İlk dörd seriyasını Türkan Derya çəkmiş, davam edən seriyalarda isə rejissor kreslosuna Cemal Şan oturmuşdur. 2010-cu il sentyabrın 23-də yayına başlayan serial, ümumilikdə 26 seriyanın ardından 2011-ci il aprelin 14-də final edərək sona çatmışdır.