Tonguç Yaşar

Tonguç Yaşar — Tərcümeyi-hal

Tonguç Yaşar (1932, İstanbul – 15 dekabr 2019, İstanbul) — türk karikaturaçısı və cizgi filmi rejissoru.

İbtidai və orta təhsilini İstanbulda almışdır. Karikaturaya 1952-ci ildə başlamışdır; ilk karikaturası həmin il "Hür Adam" jurnalında dərc olunmuşdur. "Akbaba", "Dolmuş", "Tef", "Taş Karikatür" və "Yön" jurnallarında həftəlik, "Vatan" qəzetində gündəlik karikaturalar çəkmişdir. Karikatura sənətinə gətirdiyi yeniliklər və güclü, sadə cizgiləri ilə türk karikaturasının mühüm sənətçilərindən sayılır. Karikaturalarının bir hissəsini 1969-cu ildə "Sülüname" adlı albomda toplamışdır. Cizgiləri xaricdə dərc olunmuş, beynəlxalq müsabiqələrdə mükafatlar almışdır.

Karikatura ilə yanaşı, cizgi filmləri də çəkmişdir. "Amentü Gemisi Nasıl Yürüdü" filmi ilə 1972-ci ildə Adana Qızıl Barama Film Müsabiqəsində münsiflər heyətinin xüsusi mükafatını almışdır. Həmin film 1973-cü ildə 30 ölkənin 600 filmlə qatıldığı 9-cu Beynəlxalq Annecy Cizgi Filmi Festivalında ilkin seçimi keçərək nümayiş hüququ qazanan ilk türk cizgi filmi olmuşdur. TRT Mədəniyyət, İncəsənət və Elm Mükafatları Müsabiqəsində "Yaşa Don Kişot" cizgi filmi ilə ikincilik mükafatını, Darüşşafaka Kino Klubunun 1-ci Beynəlxalq Kino Festivalında isə ən yaxşı film mükafatını almışdır.

Mədəniyyət Nazirliyinin təşkil etdiyi Nəsrəddin Xoca Cizgi Filmi Müsabiqəsində birincilik mükafatını alaraq nazirlik üçün iki Nəsrəddin Xoca filmi çəkmişdir. Fazıl Hüsnü Dağlarcanın "Balina ile Mandalina", Sait Faikin "Topal Martı" əsərləri başda olmaqla 16 qısametrajlı cizgi filmi çəkmişdir. Film titrləri də hazırlamışdır.