Sekreti i Napolit (Napoli velata) (përkthyer)

Në këtë film suspansi italian të vitit 2017 në karrigen e regjisorit është Ferzan Özpetek; skenarin e ka shkruar ai vetë, së bashku me Gianni Romoli dhe Valia Santella. Në qendër të historisë është Adriana, një mjeke ligjore në të dyzetat që punon në Napoli. Pas një nate që kalon me Andrean, më të ri se ajo dhe plot vetëbesim, të cilin e takon në një darkë, ajo beson se jeta e saj do të ndryshojë, por e pëson një zhgënjim të madh kur burri nuk vjen në takimin e rënë në ujdi.

Kur kthehet në punë, Adriana, që duhet të ekzaminojë një trup që është viktimë e një vrasjeje të dyshimtë, e gjen veten në mes të një hetimi misterioz dhe përpiqet të zgjidhë nëse ka lidhje mes kësaj ngjarjeje të errët dhe asaj nate. Giovanna Mezzogiorno në rolin kryesor e shoqërojnë Alessandro Borghi, Maria Pia Calzone, Luisa Ranieri, Isabella Ferrari dhe Carmine Recano. Filmi u shfaq në hapjen e Festivalit të 40-të Ndërkombëtar të Filmit në Moskë dhe, i nominuar në shumë kategori në çmimet David di Donatello në Itali, fitoi dy çmime.