Shtëpia e Davidit (House of David) (përkthyer)

House of David është një serial dramatik historik amerikan me temë biblike, i realizuar për Amazon Prime Video. Serialin e krijoi Jon Erwin, i cili e drejtoi së bashku me Jon Gunn; i konceptuar si një seri me disa sezone, ai rrëfen jetën e mbretit David, figurë e përbashkët e judaizmit, krishterimit dhe islamit. Prodhimin e ndërmorën Wonder Project, të drejtuar nga Erwin, dhe Amazon MGM Studios. Serialin e pritën mirë për cilësinë e prodhimit dhe për qasjen që respekton traditat hebraike.

Historia zhvillohet rreth vitit 1000 p.e.s. në Mbretërinë e Izraelit. Për të zënë vendin e mbretit Saul, të mposhtur nga mendjemadhësia, një profet e vajos si mbret të dytë Davidin, një bari të ri të përjashtuar. Teksa zemërimi i Saulit rritet, Davidi duhet të gjejë rrugën e tij në pallatin e sundimtarit mes dashurisë, dhunës dhe politikës; pas betejës me Goliatin dhe ngjitjes në fron, ai e vë në fund Dinastinë e Davidit në vend të asaj të Saulit. Davidin e luan Michael Iskander, Saulin Ali Suliman. Në kast janë edhe Stephen Lang, Ayelet Zurer, Indy Lewis, Ethan Kai dhe Ashraf Barhom; në rolin e Goliatit është Martyn Ford.

Xhirimet u bënë në Greqi në vitin 2024. Sezoni i parë nisi më 27 shkurt 2025 me tri episodet e para dhe zgjati tetë episode me transmetim javor deri më 3 prill 2025. Seriali, që arriti 22 milionë shikues në 17 ditët e para, mori miratimin për sezonin e dytë; sezoni i dytë nisi më 5 tetor 2025. Gjithsej u transmetuan 16 episode.