Qajamat Se Qajamat Tak (Qayamat Se Qayamat Tak) (përkthyer)

Qayamat Se Qayamat Tak, muzikali romantik hindu i vitit 1988 — regjia e parë e Mansoor Khan-it — u shkrua dhe u prodhua nga Nasir Hussain. Muzika është e duetit Anand-Milind, tekstet të Majrooh Sultanpuri-t, ndërsa në rolet kryesore të filmit shfaqen Aamir Khan dhe Juhi Chawla, që me këtë produksion hodhën hapat e parë në karrierën e tyre në kinema. Filmi doli në ekran më 29 prill 1988.

Historia rrëfen dashurinë mes Raj-it dhe Rashmi-t, që i përkasin dy familjeve mes të cilave ekziston një hasmëri gjaku, kundërshtimin e familjeve, arratisjen e tyre dhe ngjarjet që pasojnë; është një version modern i një historie dashurie tragjike, e frymëzuar nga Romeo dhe Zhulieta e Shakespeare-it.

Pavarësisht buxhetit të ulët, filmi pati sukses të madh në arka, duke u bërë produksioni i tretë më fitimprurës i vitit. Në Filmfare Awards fitoi tetë çmime nga njëmbëdhjetë nominime, përfshirë Filmin më të Mirë dhe Regjisorin më të Mirë, dhe u shpërblye edhe në National Film Awards. Me albumin e saj që shiti mbi tetë milionë kopje, muzika e filmit nisi karrierat e Udit Narayan-it dhe Alka Yagnik-ut; produksioni konsiderohet një pikë kthese që i dha drejtim muzikaleve romantike indiane të viteve 1990.