Dünyanın Şəfəqi (L'Aube du monde) (tərcümə)

Dawn of the World (fransızca adı ilə L'Aube du monde), İraq əsilli Fransa kinorejissoru Abbas Fahdelin ssenarisini yazıb çəkdiyi 2008-ci il tarixli Fransa-Almaniya birgə istehsalıdır. Ərəbcə çəkilən və təxminən doxsan beş dəqiqə davam edən film; müharibə, dram və romantikanı tək bir hekayədə toplayır. Film İraq kinosunun beynəlxalq dövriyyəyə ən geniş şəkildə girə bilən nümunələrindən biri sayılır.

Hekayə İraqın cənubundakı Əhvar bataqlıqlarında keçir. Fahdel İran-İraq müharibəsinin, Körfəz müharibəsinin və 1991-ci il üsyanlarının bu coğrafiyada yaratdığı çoxqatlı dağıntını bir sevgi hekayəsinin içindən göstərir. Toqquşmalar, bəzi rəvayətlərdə Adən bağının yerləşdiyi yer kimi xatırlanan bu bölgəni viran qoymuşdur və film bu itkini mərkəzə alır. Baş rollarda Hiyam Abbas ilə Venesiyada kəşf edilən gənc aktrisa Hafsia Herzi yer alır; aktyor heyətində Karim Salehin adı da çəkilir.

Ssenari qismən rejissorun uşaqlıq dostunun real hekayəsindən ilhamlanmışdır; bu dost müharibə illərində itkin düşmüşdür. Təhlükəsizlik şəraiti İraqda çəkiliş aparmağa imkan vermədiyindən film Misirdə çəkilmişdir. Fransa, Cənubi Koreya, Belçika, Portuqaliya və Birləşmiş Ərəb Əmirliklərindəki festivallarda göstərilən filmin yayım hüquqları Almaniya, Hollandiya, Livan, Hindistan və İndoneziya daxil olmaqla iyirmiyə yaxın ölkəyə satılmışdır.