Fırıldaqçılar (The Grifters) (tərcümə)

Dolandırıcılar (orijinal adı The Grifters), Stephen Frearsın rejissorluğu ilə çəkilmiş, prodüseri Martin Scorsese olan 1990-cı il tarixli Amerika neo-noir cinayət trilleridir. "Grifter" qurbanın etibarını psixoloji incəliklə qazanan fırıldaqçını ifadə edən Amerika jarqon sözüdür. Ssenari Jim Thompsonun 1963-cü il tarixli romanından Donald E. Westlake tərəfindən uyğunlaşdırılıb. John Cusack romanı 1985-ci ildə oxumuş və filmə çəkmək istəmişdi.

Hekayə kiçik fırıldaqlarla dolanan gənc dələduz Roy Dillonun (John Cusack) həyatını izləyir. Mafiya hesabına mərc fırıldaqçılığı edən anası Lilly (Anjelica Huston) illər sonra çıxıb gəlir; Royun sevgilisi Myra (Annette Bening) da eyni işin adamıdır və Lillyni ilk andan xoşlamır. İki qadının arasında qalan Roy ya bu həyatı tərk edəcək, ya da daha böyük vurğunlara yönələcək; kimin kimə oyun oynadığı getdikcə dumanlaşır.

Film Toronto Kinofestivalında 14 sentyabr 1990-cı ildə nümayiş olundu, ABŞ-da 5 dekabr 1990-cı ildə Miramax vasitəsilə ekranlara çıxdı. Məhdud nümayiş səbəbindən kassada 14 milyon dollara yaxın gəlir əldə etdi; buna baxmayaraq Huston Ən yaxşı qadın rol ifaçısı, Bening Ən yaxşı qadın ikinci plan rol ifaçısı, Frears Ən yaxşı rejissor və Westlake Ən yaxşı uyğunlaşdırılmış ssenari kateqoriyalarında Oskar namizədi oldu. Film Independent Spirit mükafatlarında Ən yaxşı film seçildi və National Board of Review-un ilin ən yaxşı on filmi siyahısına düşdü. Musiqisi Elmer Bernsteinə məxsusdur.