Kölgə (Gölge) (tərcümə)

Gölge, musiqiçi və rəssam kimliyi ilə tanınan Mehmet Gürelinin ilk tammetrajlı film kimi çəkdiyi 2008-ci il tarixli türk dramıdır. Nilgün Öneşin ssenarisini yazdığı film, Peyami Safanın intihar, şübhə, qısqanclıq, dostluq və məhəbbət kimi mövzuları işləyən Selma ve Gölgesi romanından uyğunlaşdırılmışdır; musiqi də Gürelinin imzasını daşıyır. Hekayə bir-birinə bağlı sirli intiharların ətrafında inkişaf edir və sirli bir qadının planları ilə iki yaxın dostun getdikcə bir-birini məhv edən şəxslərə çevrilməsini mövzu edir.

Görkem Yeltanın Selmanı, Memet Ali Alaboranın Şefiki canlandırdığı heyətdə Kaan Çakır, Serkan Ercan, Alper Kul və Ünal Silver də rol alır. O günə qədər daha çox komediya ilə məşğul olan Alabora bu filmlə ilk dəfə bir trillerdə imtahan verdiyini söyləmişdir. Çəkilişləri İstanbulda və Venesiyada aparılan film 2008-ci il aprelin 15-də 27-ci Beynəlxalq İstanbul Film Festivalında nümayiş olundu və 2009-cu il martın 20-də ekranlara çıxdı; 15-ci Altın Koza Film Festivalında Serkan Ercana Ən Yaxşı Köməkçi Kişi Aktyor, Selda Çiçekə Ən Yaxşı Quruluşçu Rəssam mükafatlarını qazandırdı.