Malkoçoğlu Kundër Mbretërve (Malkoçoğlu Krallara Karşı) (përkthyer)

Malkoçoğlu Krallara Karşı është film turk i vitit 1967; prodhim i Yeşilçamit që spikat me duelet me shpata dhe aventurën historike dhe që bashkon zhanret e historisë dhe të aksionit. Skenarin e filmit, që e drejtuan së bashku Süreyya Duru dhe Remzi Jöntürk, e kanë shkruar Bülent Oran dhe Ayhan Başoğlu. Prodhimin e ka marrë përsipër Naci Duru, filmin e kanë përgatitur Duru Film dhe Murat Film. Është xhiruar bardhezi dhe në 35 mm.

Historia nis kur Malkoçoğlu Ali Beu, i kthyer nga fushata e Morasë, e sheh fshatin e tij të djegur e të shkatërruar, gruan dhe njerëzit e tij të vrarë. Edhe i biri është rrëmbyer. Ali Beu niset me shokun e tij besnik Ejder për të marrë hak ndaj Kazıklı Voyvoda dhe për ta shpëtuar të birin. Përpiqet të shpëtojë një vajzë të re që e sheh në një treg skllevërish; del se vajza është në fakt një princeshë, Yolanda. Por princesha rrëmbehet sërish, ndërsa Malkoçoğlu dhe Ejder bien në një kurth dhe zihen rob. Cüneyt Arkın luan Ali Beun, Yılmaz Köksal Ejderin, Yıldırım Gencer Vlad Çepeşin, Sezer Güvenirgil Princeshën Yolanda; në kast janë edhe Remzi Jöntürk, Ahmet Turgutlu dhe Behçet Nacar.

Një pjesë e xhirimeve është bërë në Kalanë e Mamures në Anamur. Drejtor i fotografisë është Mahmut Demir. Tregohet se në skenën e hyrjes së pallatit me kalë dora e Cüneyt Arkınit u këput në kyç dhe pedagogu i tij nga fakulteti i mjekësisë, Halit Ziya Konuralp, ia qepi dorën në vend.