Znj. Dila (Dila Hanım) (përkthyer)

Dila Hanım është një dramë dashurie Yeşilçam e vitit 1977, e përshtatur nga vepra e Necati Cumalı. Regjisor është Orhan Aksoy, skenarin e ka shkruar Safa Önal; prodhimin e ka marrë përsipër İrfan Ünal në emër të Akün Film. Rolet kryesore i ndajnë Türkân Şoray dhe Kadir İnanır dhe filmi konsiderohet një nga historitë më të mira të dashurisë të kinemasë turke dhe një nga punët më të mira të këtij çifti. Filmi hyri në shfaqje më 1 janar 1978; zgjat 86 minuta.

Historia nis me betimin e hakmarrjes së Dila Hanımit (Türkân Şoray), burrin e të cilës e ka vrarë Karadağlı Rıza për shkak të një mosmarrëveshjeje toke. Dila Hanım nuk e njeh vrasësin. Një ditë, buzë përroit, has një burrë të plagosur dhe e ndihmon; burri e prezanton veten si mullixhiu Yakup. Dila Hanım, pa e ditur se ai në fakt është Rıza (Kadir İnanır), i jep zemrën, ndërsa edhe Rıza lidhet me të me një dashuri të thellë. Kur e vërteta del në shesh, Dila Hanım përballet me një zgjedhje të vështirë: sipas traditës, të mos e lërë gjakun e burrit përtokë, apo të mos hiqet nga dashuria. Në kast janë gjithashtu Erol Taş (Kara Haydar), Hüseyin Peyda (Kocabey) dhe Kadir Savun.

Muzika e filmit i përket Cahit Berkay, fotografia Kaya Ererez. Xhirimet u bënë në Nevşehir, në Luginën Zelve në Kapadokia. Në 2012 nisi të transmetohet edhe një serial televiziv me të njëjtin emër; në serial Karadağlı Rızën e luajti Erkan Petekkaya.