Qaranlıqda Oyananlar (Karanlıkta Uyananlar) (tərcümə)

Karanlıkta Uyananlar, ağ-qara çəkilmiş türk siyasi dram filmidir. Ssenarisini Vedat Türkali yazmış, filmi Ertem Göreç çəkmişdir; prodüserliyini Lütfi Ö. Akad ilə Beklan Algan üzərinə götürmüşdür. Təxminən 114 dəqiqəlik film 1964-cü il tarixli kimi qeydə düşmüş, tamaşaçı ilə 1965-ci ildə görüşmüşdür. Mövzusu boya fabrikində çalışan işçilərlə, atasının ölümündən sonra işin başına keçən və işçilərin tərəfini tutan gənc işəgötürənin apardığı mübarizədir. Həmkarlar ittifaqı, işçi hüquqları və tətil kimi məsələlərə birbaşa toxunan film dövrün türk kinosunda bu mövzuları işıqlandıran sayılı filmlərdən biri kimi xatırlanır.

Baş rolda Fikret Hakan Turgut obrazını oynayır; Beklan Algan Ekremi, Kenan Pars Fahrini, Tülin Elgin isə rəssam qızı canlandırır. Ayla Algan Ekremə aşiq olan qadını oynayır. Heyətdə ayrıca meyxanaçı Garbis rolunda Faik Coşkun və tətilçi işçi Ohannes rolunda Ahmet Koç yer alır. Dostluq, xəyanət və mübarizə önə çıxan mövzulardır; hekayə fabriklə məhdud qalmır, meyxana və məhəllə mühitlərinə də uzanır.

Görüntü rejissorluğunu Turgut Ören ilə Mahmut Demir, musiqisini Nedim Otyam etmişdir. Film Filmo Ltd. Şti. adından həyata keçmiş, səsləndirmə Lale Filmdə aparılmışdır; Fikret Hakana Sadettin Erbil, Beklan Algana Abdurrahman Palay səs vermişdir. Film 2. Antalya Film Şenliyində Ən Yaxşı Ssenari, Ən Yaxşı Orijinal Musiqi və Ən Yaxşı Üçüncü Film mükafatlarını qazanmış; lakin bir qrupun etirazından sonra Daxili İşlər Nazirliyinin qərarı ilə nümayişdən çıxarılmışdır.